miércoles, 7 de diciembre de 2016

EPILOGO BAT!!

Abenduak 1. Le bukowski (Egia) aretoan kriston ekitaldi puska dago. Anari taldea zuzen zuzenean bere azken lana aurkezten. "Epilogo bat" diska, 6 kantaz osaturik dago, eta musikari askoren laguntza izan du. Bukowskin jotako zuzenekoan ere musikari eta lagun handiez elkartu zen. Ohikoak diren Mikel (bateria), Mariano (teklatuak), Drake (baxua) eta Borja (kitarra)-ri, Miren Narbaiza, Ander Mujika, Txap, Ager Isuntza,....gehitu behar zaie. Sekulako ikuskizunaren partaide izan giñen.


Kontzertuak bi zati izan zituen. Lehenengoan, taldeak azken diskaren abesti guztiak jo zituen. Esan bezala, abesti bakoitzean musikari gonbidaturenbat azaltzen zen. Oso motibaturik ikusi nuen taldea, lehenengo abestitik dena emanez. Aretoa toperaino betea zegoen, horrek ederki asko laburbiltzen du formazio honek daukan trasmititzeko gaia. Azken lan hontan ere, abesti hunkigarriak dauzkagu, emotiboak, min egiten duten horietakoak. Hitz poetikoak, kalitatez josiak. Zuzenean, magia sortzen dute, eta abestien burrunbak, taldearen portaera gehituz, ekitaldi handi batean bihurtzen dute asuntoa. Musikari handiak, abesti perfektuak egiten. Laburbilduz, hasiera batean, azken diskako abestiak entzun genituen. Eszenatokitik irten eta jendearen txalo eta garraxiei kasu eginez, berriro ziren taulapean. 

Mikel Laboaren heriotzaren 8 urte igarotzen zirenez, taldeak omenaldi beroa eskeini zion, eta bide batez, maixuaren konposizio batzuk entzuteko parada izan genuen. Anari-k sentimendu handiz jo zituzten Laboaren kantak, nabaria da gustuko dutela Mikel-en musika. "Liluraren kontra", "Izarren hautsa", "Aintzinako bihotz", "martxa baten lehen notak". Uff, izugarria!! Emozionatu ez zena ez da gizakia.

Ordu bateko saioa gutxi gora behera. Aspaldian ikusi dudan ekitaldirik sentituena, intimoena. Aupa Anari, zuen musika ez dadila inoiz ixildu!!